1 jul. 2010

Oradoiro de hip hop con AID


No pasado mes de maio, a rapeira viguesa AID foi a encargada de achegar dun novo xeito o galego ao segundo ciclo de ESO do IES Escolas Proval.

Tratouse dun obradoiro de hip hop no que AID e os seus dou acompañentes fixeron que o alumnado participase nas rimas da rapeira, á vez que comprobaron os pasos do break dance e viron como se elabora un graffiti.

24 jun. 2010

UXÍO NOVONEYRA


O Equipo de Normalización e Dinamización Lingüística do IES Escolas Proval, con motivo da dedicación do Día das Letras Galegas ao autor courelán Uxío Novoneyra, organizou unha exposición de láminas arredor de textos dos diferentes universos tratados polo escritor acompañados de imaxes que recrean e axudan á visualización da escrita.

O metapaisaxismo como tema central, pero tamén o intimismo e o compromiso, son as temáticas desta documentación que promete ser un material de traballo interesante para vindeiras xeracións de estudantes do noso centro.

CANDIDO PAZÓ

O día 30 de abril o alumnado de primeiro ciclo da ESO do IES Escolas Proval desprazouse ao auditorio Lois Tobío de Gondomar para gozar da actuación de Candido Pazó, quen espertou neles un amplo sorriso contaminado polos máis revolucionados instintos adolescentes.

Foi unha actividade positiva que lles permitiu participar activamente e con disposición nun acto de lingua, cultura e actualidade fóra do espazo exclusivamente académico.

PANEL DE LINGUAS II - ACTIVIDADES

A expectación que levantou o noso Panel de Linguas foi abraiante. Os alumnos e alumnas procurando a súa lingua, a dos seus compañeiros, e mesmo algún a da súa fala entre a riqueza textual que se inxire entre as imaxes. Así, o Equipo de Normalización xunto co profesorado de Lingua galega, achegaron os diferentes grupos ao Panel das Linguas, pendurado aínda no patio de entrada ao centro, cunha serie de actividades que deberían traballar, orientadas por unha banda ao primeiro ciclo da ESO e por outra ao segundo ciclo e cursos superiores, actividades coas que se situaron arredor da polisemia do termo lingua e do coñecemento e realidade da súa e as súas linguas.

CONCURSO DE HAIKUS - RESULTADOS


O pasado 21 de maio entregáronse no auditorio Lois Tobío de Gondomar os premios ao haikus gañadores do 1º Concurso de Haikus do Val Miñor. Un concurso que nos descubriu interesantes traballos do alumnado dos catro IES participantes, dos que podemos ver os premiados e os que recibiron algunha mención especial no folleto que foi repartido no auditorio a participantes e asistentes.


Contamos ademais coa participación e actuación de Leo i Arremecaghona, quen ademais é autor dun libro de haikus que formaba parte do lote de agasallos que recibiron os premiados. De feito, o retraso na entrega desta parte do agasallo fixo que Leo se achegase aos IES a entregalo, e así podemos velo nesta fotografía que se fixo con parte do alumnado participante do IES Escolas Proval.

14 abr. 2010

CONCURSO DE HAIKUS DO VAL MIÑOR

De cando en vez
as nubes danlle repouso
aos namorados da lúa.
Basho
Os equipos de Normalización e Dinamización Lingüística dos centros IES Auga da Laxe, IES Escolas Proval, IES Terra de Turonio e IES Val Miñor, coa colaboración dos seus departamentos de Lingua e Literatura Galega, organizan para o segundo ciclo de Educación Secundaria Obrigatoria o 1º Concurso de Haikus, unha das formas da poesía tradicional xaponesa máis estendidas.
As bases do concurso , (aquí), están a disposición do alumnado en cada un dos centros, nos que ademais, nalgún caso, se celebrarán fases previas de clasificación.
O peche desta actividade será cun acto público o 21 de maio no que se contará coa actuación de Leo i Arremecághona, actuación á que estará convidado o alumnado participante no certame.

PANEL DE LINGUAS

"Eu non falo o que ti falas
que eu non falo por falar
pero, mira, xa que falo,
en que lingua vou falar
lingua viva, lingua morta
bota a lingua para falar"

Antón Reixa


Nunha das entradas ao centro IES Escolas Proval permanece pendurada dende finais de marzo unha atractiva e sorprendente iniciativa que deixou plasmada nun panel de dous por tres metros a mestura das imaxes das linguas fisicas de boa parte do alumnado , profesorado e persoal do centro con textos en lingua escrita de autores galegos coñecidos onde figura citado o termo lingua.
Deste xeito, o Equipo de Normalización do centro convídanos a reflexionar sobre o verdadeiro significado da lingua en cada un de nos, ou quizais das linguas, porque aquí son varios os significados e múltiples as reflexións que podemos extraer do termo protagonista: a lingua, a nosa.

CONCURSO LINGUAS DE AMOR















O Equipo de Normalización e Dinamización Lingüística organizou no mes de febreiro o concurso de poemas "Linguas de Amor". Tomando como pretexto o Día dos namorados e o sempre apaixonante casamento dos paxaros no Día da Candeloria, convidamos ao alumnado a presentar as súas composicións poéticas coas que, ademais de afondar nas súas dotes artísticas e poder compartilas cos seus compañeiros e compañeiras, poderían optar a diversos premios.
Os premiados no concurso foron:
  • 3º : Ana Belén Vilar (S2B) co poema "Chegou pisando as pozas"
  • 2º : Laura Rodríguez (S2B) co poema "Amor, amor"
  • 1º : Diego Sandín (S2A) co poema "Chispas de Amor"
E as chispas de amor, como ben lle soubo chamar o noso gañador, ficaron expostas no taboleiro do corredor que está a carón da aula 27. Alí puidemos gozar da lectura, non só dos poemas premiados, senón tamén dalgúns versos doutros participantes.
Os premios que recibiron foron un CD de música galega actual, de Som do galpom, Loretta Martin e Dios Ke Te Crew.

Agardamos que esta iniciativa teña continuidade e que o vindeiro ano se vexa incrementada a participación e o noso alumnado deixe saír o poeta ou poetisa que leva dentro.